Un messaç tra amîs t’un grup Whatsapp: “Vêso mai fat câs che la Contee e je come il Friûl? I hobbit a fasin fieste tirant su tendons e fasint cjoche, daspò a tirin i fûcs; i hobbit a girin discjampinele e a son contadins e alevadôrs; i nons dai hobbit a son storpiaduris di nons furlans:Pipino/Pipinot, Merry/Marie ecc; se tu vâs fûr de Contee, ti dan par muart”. Nancje timp di rindisi cont e in tre di nô o sin finîts a fevelâ di ce robe maraveose che e sarès vignude fûr. Il dì dopo un al veve scomençât a dopleâ tocs de pelicule par fâ viodi ai amîs che il risultât al podeve jessi bon. Tal gîr di dôs setemanis il trailer al jere pront, inviât atôr par domandâ ai altris amîs di partecipâ.

Ai prins di Lui o sin jentrâts in contat cu l’ARLeF, che nus à dat il so sostegn, e cu la Società Tolkieniana Italiana te persone dal sô fondatôr Paolo Paron, che nus à ancje metûts in contat cu la Medusa Film par fânus vê la aprovazion dal lavôr. Otignude la rispueste positive de Medusa, ai 16 di Lui o vin fate la prime presentazion dal progjet a Roverêt in Plan, ae fin di una conference di Paolo Paron te serade di vierte di “PordenonePensa”. Di chê strade o sin finîts su “RadioSpazio” e su “La Vita Cattolica”, daspò sul “Gazzettino” e sul TGRegione di RAI 3.

Viers la fin dal mês o vin mandât il copion, midiant de ARLeF, al Sportel pe Lenghe Furlane par lis corezions. La scjadince e je fissade pal mês di Setembar.